ग्रामीण भागातील कार्यकर्त्यांशी नाळ जोडणारा नेता

–शशिकांत बोडके

ग्रामीण भागातील कार्यकर्त्यांशी नाळ जोडणारा नेता म्हणून सुनील शेळके यांची ओळख आहे. समाजसेवा, जबाबदारी, कर्तव्य, प्रामाणिकपण, पक्षनिष्ठा, कार्यकर्त्यांची घट्ट वीण, रांगडी बाणा असे सर्व गुण असलेले आ. सुनील शेळके माझे राजकारणातील आदर्श आहेत. स्वामी विवेकानंद यांच्या ‘उठा, जागे व्हा आणि ध्येय गाठेपर्यंत थांबू नका’ या विचाराने प्रवृत्त होऊन आमदार शेळके मावळच्या प्रगतीसाठी रात्रंदिवस कठोर परिश्रम घेत आहेत. पंडित दीनदयाळ उपाध्याय यांची ‘अंत्योदय’ ही संकल्पना मनात खोलवर रुजल्यामुळे आमदार शेळके हे गरजूंना मदत करण्याला प्रथम प्राधान्य देतात.

समाजसेवेला आणि जनसामान्याला प्राधान्य देणारा नेता अशी खास ओळख शेळकेसाहेबांची आहे. १९९५ मध्ये राजकारणात प्रवेश करीत प्रथम भारतीय जनता पक्षाचे नगरसेवक म्हणून निवडून आले. याचदरम्यानच्या काळात भाजपवाढीसाठी केलेल्या कामाची दखल घेत त्यांना पक्षाने शहराध्यक्षपदाचा पदभार देऊन सन्मानित केले. आपल्या क्षेत्राच्या सर्वांगीण विकासासाठीचा आवेश आणि जिद्द, मनात ठेवून काम केल्यामुळे आ. शेळके दोनदा भाजपकडून तळेगाव दाभाडे नगरपरिषदेवर निवडून गेले. २०११ मध्ये ते विरोधी पक्षाचा भाग होते, तरीही त्यांनी स्थायी समिती नियोजन व कुटुंबकल्याण सदस्य म्हणून काम केले.

त्यांच्या प्रेरणादायी नेतृत्वशैली आणि दृढ निश्चयामुळे त्यांना २०१३ मध्ये तळेगाव परिषदेत त्यांच्यावर विरोधी पक्षनेते म्हणून जबाबदारी देण्यात आली. २०१६ मध्ये, दुसर्‍या कार्यकाळात ते भाजपकडून बिनविरोध प्रतिनिधी म्हणून निवडून आले. त्यांनी उपसभापती, म्हणून तसेच तळेगाव दाभाडे नगर परिषदेच्या पाणीपुरवठा विभागाचे अध्यक्ष म्हणूनही काम पाहिले आहे. तळेगाव दाभाडे यांच्यात अत्यंत कमी खर्चाने पाणीटंचाईचे संकट दूर करण्यासाठी ते खूप मोलाचे ठरले.

भारतीय जनता पक्षाचा एक भाग असल्याने सुनील शेळके भविष्यात अविरत सेवेचे आश्वासन देऊन सातत्याने प्रामाणिकपणा आणि विश्वासार्हतेच्या मार्गावर कार्य करीत आहेत. तळेगावात त्यांनी अनेक विकासाची कामे केली. या कामाची दखल घेत त्यांना विरोधी पक्ष असलेल्या राष्ट्रवादी काँग्रेस पक्षाने २०१९ मध्ये विधानसभेची उमेदवारी दिली. त्यांनी केलेल्या विकासकामाचे दाखले देत त्यांनी विजयश्री खेचून आणली. आज मावळ मतदारसंघात खऱ्या अर्थाने विकास साधला जात आहे.