कुरुलकरनंतर जळगावचा तरुण पाकिस्तानी ललनाच्या जाळ्यात; तरुणीला पुरवली गोपनीय माहिती

मुंबई | पुणे संरक्षण संशोधन आणि विकास संस्थाचे तत्कालीन संचालक प्रदीप कुरुलकर पाकिस्तानच्या हनी ट्रॅपमध्ये अडकल्याचे मे महिन्यात उघड झाले होते. या घटनेनंतर आता पुन्हा एका भारतीय युवकास पाकिस्तानी ललनाने आपल्या जाळ्यात ओढले आहे. हा तरुण मुंबईत नोवल डॉकमध्ये कार्यरत आहे. पाकिस्तानी मुलीच्या जाळ्यात येऊन त्याने संवेदनशील माहिती पुरवल्याचे स्पष्ट झाले. नेव्हीमध्ये ज्युनियर पदावर असणारा गौरव पाटील याला महाराष्ट्र दहशतवाद विरोधी पथकाने (एटीएस) त्याला अटक केली.

नेमकं प्रकरण काय ?

नोवल डॉकमध्ये काम करणारा गौरव पाटील हा फेसबुकवर आरती शर्मा आणि आणखी एका तरुणीच्या संपर्कात आला. फेसबुकवर हे बनावट अकाउंट्स होते. या माध्यमातून गौरव पाटील याला अडकवण्यात आले. गेल्या चार ते पाच महिन्यांपासून तो त्यांचा संपर्कात होता. पाकिस्तानी पीआयओ एजंट्सने गौरव पाटील याच्याकडून गोपनीय माहिती घेतली. एप्रिल, मे 2023 ते ऑक्टोबर 2023 या काळात फेसबुक व व्हॉटसअ‍ॅपवर चॅटींग त्यांचे सुरु झाले. गौरव त्यांना गोपनिय माहिती वेळोवेळी देऊ लागला. त्यासाठी ते एजंट गौरव याला पैसे देत होते.

जळगावचा गौरव ठाण्यात राहत होता…

गौरव हा मुळचा जळगाव जिल्ह्यातील आहे. ठाण्यामध्ये तो वास्तव्यास आहे. फ्लॅटमध्ये तो एकटाच राहत आहे. पाकिस्तानी एजंट्सच्या तो संपर्कात असल्याची माहिती एटीएसला मिळाली होती. त्यानुसार एटीएसने गौरव पाटील याच्यावर नजर ठेवली. त्याच्यावरील संशय बळावताच त्याला अटक केली. पाकिस्तानी इंटेलिजन्सला गौरव पाटील याने काही शिप्सची माहिती दिल्याचे तपासात उघड झाले आहे. महाराष्ट्र एटीएसने गौरव पाटीलला अटक केली असून आणखी तिघांना आरोपी बनवण्यात आले आहे.